Ялемын историйже.

Ялын шочмо историйже пеш оҥай. Ожно мемнан ял олмышто чодыра гўжлен шоген. Тораште огыл Шора вўд шке корныж дене вер-шȍрым сȍрастарен йоген эрта. Чодырасе кайыквусым шке тамле вўдшȍ, модын ийше колжо дене чыла чонаным сийлен. Тиде могырыш эн ондак Морко район, Унчо гыч Епрем коча толын. Тудо сонарзе  лийын. Епрем коча тыгай сылне вер-шȍрым ужын налмеке, тышке кодын, ешыжымат пырля конден. Тудын почеш эше икмыняр еҥ толын, эркын пȍртым чоҥеныт, пырля ваш-ваш келен илаш тўҥалыныт. Тыге тукым шарлен. Вара тышке ик татар кўтўм кўташ толын.  

Тудын лўмжȍ Ибдрахим лийын.  Тыште келшенат, шке ешыж дене илаш куснен. Тыге тиде кундемыште кок калык илаш тўҥалын. Кажне калыкын шке тукымжо шарлен. Ялын кўшыл могыржылан Шурабаш манын, тушто татар-влак илат, а ўлыл велжылан Шийшор манын лўмденыт. А молан тыге? Вер купан лийын. Тудым коштеныт. А ик тураште "шоррр" йоген, памаш лектын шинчен. А тудыжо кече дене ший гай йылгыжын. Сандене Шийшор маныныт. Ялын лўмжȍ илен толмо корныштыжо вашталт толын. Вара семын тудым документыш Шурабаш манын пуртеныт, а ме ныжылгын марла Шорамучаш манына. Ожнысо лўмжым арален кодаш манын, калык фольклор ансамбль "Шишор" лўмым нумалеш.

Ялемын лўмжȍ Шурабаш. Тудо Татарстан Республикысе Арский районеш пура. Шурабаш кундем Марий Эл Республикын кок районжо: Марий Турек ден Морко  деч тораште огыл верланен. Ялыште чылаже 130 сурт уло. 215 марий-влак улыт, а татар-шамыч - 191. Ялна чодыра деч мўндырнак огыл верланен. 7 уреман: 1 уремже лўмлȍ марий писательын, С.Г.Чавайнын, вес уремже икымше профессионал марий композитор И.С.Ключников-Палантайын лўмжым нумалыт. Тыныслык урем поснак ужаргылан шотлалтеш. Ялыште "Дуслык-Келшымаш" йоча сад, 2 кевыт, ялсовет, медпункт уло. Тыгак тўвыра пȍрт пеш тыршен пашам ышта. Клуб воктене - библиотека.

Библиотекына 3 йылме дене книга, газет, журлналлан поян. Тўвыра пȍрт пелен марий фольклор калык ансамбль "Шишор" пашам ышта. Ик ий ончыч ансамбльын 

ончыкылыкшо лийже манын, ме тудын "спутникшым", "Изэҥер" йоча коллективым чоҥышна. Тушко ме, марий ўдыр-рвезе-влак, уло кумылын марий сем почеш кушталташ да чон почын муралташ коштына. Концертым шындена, эсогыл район да республик кўкшыт фестиваль, пайремлаште шке мастарлыкнам ончыктена.

Ял тўрыштȍ тўҥ школ негызым пыштен. Тушто чылаже 64 йоча шинчымашым налеш, нунын кокла гыч марий тунемыже 15 улына.

 Тачысе кечылан марий, руш, татар, англичан да немыч йылмым тунемына. Тыге йоча-влак 5 йылмылан поян улыт. Марий йылмым да литературым йȍраташ да тунемаш О.И.Антипова ден С.Т.Анисимова кумылаҥдат. Каласен кодаш кўлеш, тылеч ончыч марий школым почыктышо да марий йылме да литературым урок семын туныкташ тўҥалмым, ялын талешкыже Токташ Туйбатрович Туйбатров нерген. А школым чоҥаш шке мландыжым пуышо Алексеев Ведаска лийын. Марий йоча-влакын шке школышт, шке йылмышт лийже манын, ончыкылышт верч нуно тыршеныт. Эше марий йылме да литератур туныктышо: М.Н.Айбарцева, Е.М.Емикиева, И.В.Еремеева, Ж.В.Буркова, А.Т.Туйкиева самырык еҥлан шке шочмо йылмыже нерген утларак пален налаш полшеныт.

         Эх, пайремжат, пайремжат...

                       Шорыкйол толеш - пура йўаш,

                       Ўярня толеш - мунчалташ,

                       Кугече толеш - лўҥгалташ,

                      Семык толеш - таҥ кучаш.

     Ял калык тыгак марий пайрем-влакым пайремла. Кугече, Сорта, Семык пайрем шке вержым налын шога. Кеҥежым Сабантуй але Пеледыш пайрем  весела да оҥайын эрта. А Шорыкйол пайремым поснак палемден кодымо шуэш. Тиде пайремым марий калык гына огыл, татар калыкат йȍрата да вуча. Тиде кечын ме чыланат: марийжат, татаржат, Васли кува ден кугыза лийына, тўрлȍ семын маскым, вургемым савырен,