"Mga anak, bumalik na kayo sa Pilipinas.  Nakapag-ipon na naman kayo ng sapat para sa inyong sarili. Panahon na upang tumulong kayo sa inyong mga kababayan at pakinabangan ng ating bansa ang inyong talino."

      Ito ang liham ni Tatay Felix sa kanyang mga anak na noon ay nasa ibang bansa at nagtatrabaho sa magagandang kompanya.  Isinulat ito ng kanilang ama matapos pumutok at nanalanta ang Bulkang Pinatubo sa Zambales.

      Ang lugar na kanilang kinalakihan ay isa sa mga naapektuhan ng pagsabog ng bulkan. Halos nasira ang kabahayan at kabuhayan ng mga tao.  Kahirapan at gutom ang bumalot sa buong lugar.

      Agad bumalik sa Pilipinas ang magkakapatid. Kahit noong bata pa lamang sila ay hindi nila magawang suwayin ang kanilang ama kapag ito ay may sinasabi o inuutos. 

     Si Tatay Felix ay hindi naging mahigpit o istrikto sa kanila sa halip itinuro niya sa kanyang mga anak kung paano maging responsable at disiplinado sa buhay.  

     Likas kay Tatay Felix ang pagiging mabuting tao at maprinsipyo sa buhay.

      Nakapagtapos sa kolehiyo ang limang magkakapatid. Nang sila ay makapaghanapbuhay ay nadala nila ang lahat ng pagpapahalagang natutuhan nila sa kanilang magulang kasama na rito ang pagiging matulungin sa kapwa.

      Nang pumutok ang Bulkang Pinatubo noong 1991,nakita ni Tatay Felix ang kaawa-awang kalagayan ng mga tao sa kanilang lugar. Sa tulong ng mga anak na nasa ibang bansa ay tinulungan niya ang kanyang mga kababayan sa pamamagitan ng pamamahagi ng mga pagkain at gamit na mayroon sila.