Si Patricia ay nag-iisang anak ni Mang Patrick at Aling Tricia kaya naman parang kapatid na ang turing niya sa kanyang mga alaga. Mayroon siyang aso na ang pangalan ay Doglas at pusa na ang pangalan ay Cathy.

Araw-araw ay naglalaro sina Patricia, Doglas at Cathy. Kahit sina Mang Patrick at Aling Tricia ay masaya tuwing nakikita ang kanilang anak na tuwang-tuwang makipaglaro sa mga alaga.

Subalit hindi alam ni Patricia na mayroong lihim na inggitan ang kanyang mga alaga sa isa’t isa. Isang araw, habang nasa trabaho si Mang Patrick at si Patricia naman ay sumama sa kanyang ina sa palengke ay naiwan ang mga alaga sa bahay at nag-away ang mga ito.

Hindi sinasadyang maihulog ni Cathy ang isang libro sa lamesa kay Doglas na siya namang natutulog sa gilid. Nagising ang aso at galit na galit ito dahil mahimbing na sana ang kanyang pagkakatulog. Dahil sa inis na nararamdaman ni Doglas ay hinabol niya ng hinabol si Cathy at ng mahuli ay kinagat ito. Hindi naman nilakasan ng aso ang kanyang kagat ngunit nagdulot ito ng maliit na sugat at kaunting pagdugo

Nakita ito ni Patricia pag-uwi niya at nagalit siya kay Doglas. Hindi niya ito pinakain habang awang-awa kay Cathy. Nais ni Patricia na matuto ang aso at huwang ng ulitin ang ginawang ito. Nanghina si Doglas at masama ang loob sa parusang iginawad sakanya ng kanyang amo.

Nang sumunod na araw, umalis muli ang mag-inang Aling Tricia at Patricia. Saktong pagsarado ng pintuan ng mga ito ay itinulak ni Cathy ang kanyang kainan patungo kay Doglas. Hinang-hinang bumangon ang aso at kinain ang natitirang pagkain ng pusa.