Ég á kött og hann er grænn.

Kötturinn minn er kelinn og vænn.

Hann ævintýrum lendir í.

Nú langar mig að segja frá því.

Hér kemur sagan um græna köttinn.

Ert þú með skott?

Græni kötturinn kitlar mig

þegar hann malar og teygir sig

í kringum báða mína fætur.

Sjáðu, hvernig kisi lætur!

Hvar kitlar þig?

Á fótum mínum búa þær,

tíu skrýtnar tígristær.

Kisi var ekki heppinn í gær!

Þær bíta og klóra komir þú nær!

Veist þú um eitthvað annað röndótt?

Allt í einu kemur hann skoppandi,

dóppótti boltinn hoppandi.

Gott væri hann að naga....

Hvernig hoppar þú og skoppar?

Nú endar þessi saga!

Er hún búin?

Doppótti boltinn rúllar að mús

sem bíður við sitt litla hús.

Hann skoppar hratt og hefur hátt.

Músin verður ekki sátt.

Hvað er inni í húsinu?

Litla músin köttinn sér,

hleypur hratt, já, það finnst mér.

Hún vill ei verða maturinn

fyrir græna köttinn minn.

Hvert hleypur músin?

Músin afar snjöll nú er,

finnur vin að bjarga sér.

Hundur birtist, urrar lágt,

kisi stoppar, getur fátt.

Hvað ætli hundurinn vilji bíta í?

Hundurinn í boltann bítur.

Boltinn á feiknahraða þýtur

upp í himinloftin blá.

Kisi liggur ofan á.

Hvað heyrist í boltanum þegar hann þýtur upp?

Boltinn loftlaus orðinn er.

Kisi hrapar, niður fer.

Hrikalega fer hann hratt

þráðbeint niður, alveg satt.

Hvert fór boltinn?

Nú er kisi kominn niður,

enda er það katta siður

að brjóta hvorki fót né skott.

Kisi datt í gamlan pott.

Hvaðan kom potturinn?

Dagurinn hefur verið langur,

nú er kisi skelfing svangur.

Kisi er að verða trylltur!

Er hann nokkuð orðinn villtur?

Hvað gerist þegar maður er villtur?