-ვინ იყო იაკობ გოგებაშვილი?

-ამას რა კითხვა უნდა -

„დედა ენის“ ავტორი!

-რა არის „დედა ენა“?

-„დედა ენა“ არის წიგნი, რომელიც ქართველებს წერა-კითხვას ასწავლის.

„აი ია“- ამ ასო-ბგერებით იწყება „დედა ენა“.

„აი ია“-აღარასოდეს გავიწყდება.

საყვარელ სიმღერასავით მუდამ შენთან არის ეს მშვენიერი ხმოვნები.

ხომ უბრალოა, მაგრამ რა ლამაზია...

-ნეტავ როგორ მიაგნო იაკობმა ამ სილამაზეს?

-გეტყვი როგორ მიაგნო. ბუნებას უსმენდა და იქ გაიგონა.

-სად დაიბადა იაკობ გოგებაშვილი?

-იგი დაიბადა თბილისთან ახლოს , სოფელ ვარიანში. აი, მისი სახლი.

-აქ გაატარა უზრუნველი ბავშვობა. თამაშობდა, თევზაობდა, საწნახელში წურავდა ყურძენს, უსმენდა ფრინველების ჭიკჭიკს, წყაროს ჩუხჩუხს...

-უმაღლეს სასწავლებელში სწავლისას იაკობს განსაკუთრებით აინტერესებდა პედაგოგიკა.

-რატომ მაინცდამაინც პედაგოგიკა?

-იმიტომ, რომ სურდა შეექმნა ქართული სახელმძღვანელო, რათა ქართველ ბავშვებს მშობლიურ ენაზე ესწავლათ. მაშინ ქართული სკოლები არ არსებობდა. ქართველებს ქართულად ლაპარაკსაც კი უკრძალავდნენ.