23 აპრილს მსოფლიოში წიგნის საერთაშორისო დღეს აღნიშნავენ. თარიღი „იუნესკომ“ აირჩია და წიგნის საერთაშორისო დღედ გამოაცხადა. წიგნის საერთაშორისო დღე ყოველწლიურად საქართველოშიც აღინიშნება.

1923 წლის 23 აპრილს, მიგელ დე სერვანტესისა და უილიამ შექსპირის გარდაცვალების დღეს, კატალონიელი წიგნის გამყიდველების მიერ მოწყობილი წიგნების ფესტივალი ტრადიციად 1995 წელს იქცა.

„იუნესკოს“ გადაწყვეტილება მსოფლიომ დიდი ენთუზიაზმით მიიღო. განსაკუთრებით აქტიური ორი ქვეყანა გამოდგა: ნიდერლანდები, სადაც ამ დღესასწაულს „თეთრი წიგნის კვირეულით“ აღნიშნავენ და დიდი ბრიტანეთი, სადაც წიგნის მსოფლიო დღე დიდ დღესასწაულად იქცა, თანაც 23 აპრილი შექსპირის დაბადების დღეცაა.

წიგნის საერთაშორისო დღეს საფუძველი 1923 წელს კატალონიაში ჩაეყარა. მიგელ დე სერვანტესის გარდაცვალების დღეს, 23 აპრილს მამაკაცები ქალებს ვარდებს ჩუქნიდნენ, ხოლო მათგან სამაგიეროდ წიგნებს იღებდნენ. ეს იყო ქალების მხრიდან თითქოს შეხსენება, რომ წიგნს ვერაფერი შეცვლის. ქალები მხოლოდ მათ რჩეულ მამაკაცებს ჩუქნიდნენ წიგნებს. წიგნი იმ დროში დიდ ფუფუნებას წარმოადგენდა, ამიტომ ამის საშუალება მხოლოდ დიდგვაროვანი წრეების წარმომადგენლებს ჰქონდათ.

საქართველო 2003 წელს შეუერთდა იმ 80 ქვეყანას, რომელიც აღნიშნავს წიგნის საერთაშორისო დღეს და ამ წლიდან მოყოლებული იმართება წიგნების გამოფენა-გაყიდვა, სადაც მკითხველს სთავაზობენ ფასდაკლებებს, ასევე ეწყობა ახალი წიგნების პრეზენტაცია, შეხვედრები ავტორებთან…მიზანი კი არის ახალი, განათლებული თაობის აღზრდა და წიგნის მნიშვნელობის ხაზგასმა.

"იკითხეთ კარგი წიგნები, ეს წარსული დროის საუკეთესო ადამიანებთან საუბარია, თან ისეთი საუბარი, როდესაც ისინი თავიანთ საუკეთესო აზრებს გვიმხელენ." 

რენე დეკარტი